Delegacioni i Doganës së Kosovës ka marrë pjesë në takimin e parë të Grupit të Projektit për Electronic Proof of Certificates (e-PoC), të organizuar nga Komisioni Evropian.
Ky takim shënon një hap të rëndësishëm në avancimin e projektit e-PoC për formalitetin EUR1, në kuadër të Konventës PEM. Diskutimet u përqendruan në zhvillimin legjislativ, modelimin e proceseve të biznesit, forcimin e sistemeve të bashkëpunimit administrativ dhe licencimit elektronik në nivel të BE-së.
Në njoftimin për media, Dogana e Kosovës thekson se pret me interes vazhdimin e diskutimeve konstruktive, veçanërisht për strukturimin e nën-grupeve të punës, ndarjen e përgjegjësive dhe zbatimin e projektit në administratat pjesëmarrëse.
Dogana kontribuon aktivisht me ekspertizë të konsoliduar në fushën e proceseve dhe digjitalizimit, në funksion të thellimit të bashkëpunimit rajonal dhe evropian në sektorin doganor. Ajo shpreh mirënjohje të veçantë për Komisionin Evropian dhe ekipin e Programit të Doganave për organizimin dhe koordinimin e kësaj nisme.