Dogana e Kosovës zbuloi 20 ngrohëse të padeklaruara gjatë kontrollit të një automjeti me targa të Shqipërisë, në pikën e kalimit kufitar në Vërmicë, më 23 tetor. Mallrat kanë vlerë të përafërt prej 1,200 eurosh, pa përfshirë taksat doganore.
Sipas njoftimit të Doganës, automjeti u përzgjodh për kontroll bazuar në analizën e riskut. Gjatë intervistimit, udhëtari nuk deklaroi mallra për raportim te autoritetet doganore.
Për shkak të dyshimeve, zyrtari doganor e udhëzoi udhëtarin ta dërgonte automjetin në vijën e dytë të kontrollit. Gjatë verifikimit më të hollësishëm u gjetën 20 ngrohëset. Dogana i ndaloi mallrat dhe bëri të ditur se rasti do të trajtohet në përputhje me procedurat administrative dhe legjislacionin në fuqi.
Në njoftim, Dogana tha se angazhimi i saj për parandalimin e kontrabandës dhe tregtisë së paligjshme synon mbrojtjen e interesave ekonomike të vendit, konkurrencën e drejtë ndërmjet operatorëve ekonomikë dhe zbatimin e njëtrajtshëm të legjislacionit doganor.