Një dokument i publikuar nga Departamenti Amerikan i Drejtësisë, mes më shumë se 3.5 milionë dosjeve, ka ngritur pikëpyetje për kronologjinë e vdekjes së financierit amerikan Jeffrey Epstein.
Dokumenti, një njoftim federal i lëshuar nga Zyra e Prokurorit Federal për Distriktin Jugor të Nju Jorkut më 9 gusht 2019, raporton se Epstein u gjet pa ndjenja dhe u shpall i vdekur. Kjo datë paraprin zbulimin zyrtar të trupit të tij në qeli më 10 gusht 2019, rreth orës 6:30 të mëngjesit, nga një oficer gjatë shpërndarjes së mëngjesit.
Kronologjia zyrtare
Sipas të dhënave të burgut, personeli mjekësor tentoi ringjalljen e Epstein-it, 66 vjeç, por ai u shpall i vdekur pak më vonë. Mjeku ligjor e klasifikoi vdekjen si vetëvrasje me varje. Koha e saktë e vdekjes nuk është përcaktuar zyrtarisht për shkak të dështimeve në siguri.
Prokurori i atëhershëm Geoffrey S. Berman deklaroi në njoftim: "Herët këtë mëngjes, Qendra Federale e Paraburgimit në Manhattan konfirmoi se Jeffrey Epstein, i cili përballej me akuza për trafikim seksual të të miturve, u gjet pa ndjenja në qelinë e tij dhe pak më vonë u konstatua vdekja e tij. Ngjarjet e sotme janë shqetësuese dhe mund të pengojnë viktimat për të folur në gjykatë, por ne mbetemi të përkushtuar ndaj tyre dhe hetimit".
Dështimet në siguri
Autoritetet kanë pranuar se rojet nuk kryen kontrollet e detyrueshme gjatë natës dhe kamerat e sigurisë pranë qelisë nuk funksiononin. Dokumentet e reja përmendin pamje të paqarta të një figure të paidentifikuar që lëvizte pranë katit ku mbahej Epstein, por hetuesit nuk konfirmuan lidhje me vdekjen.
Epstein u arrestua më 6 korrik 2019 dhe priste gjyqin për akuza federale për trafikim seksual të të miturve dhe komplot. Çështja mbetet një nga skandalet më të mëdha penale në SHBA, me hetime që vazhdojnë.
Përditësime
Geoffrey S. Berman dha një citat të zgjeruar, duke iu drejtuar drejtpërdrejt viktimave: "Vajzave të reja dhe të guximshme që kanë folur tashmë... mbetemi të përkushtuar të qëndrojmë në krahun tuaj dhe të vazhdojmë hetimin".
FBI dhe DOJ kanë publikuar pamje të reja nga kamerat e sigurisë, që tregojnë momentin kur rojet gjetën trupin e Jeffrey Epstein më 10 gusht 2019.
- Një figurë me uniformë portokalli shkon drejt qelisë në orën 22:39, e identifikuar nga FBI/DOJ si rojë ose i burgosur i mundshëm.
- Hyrja në qeli ndodh rreth 6:30-6:39.
- Shpallja e vdekjes bëhet në 6:39.
- Jeffrey Epstein u dërgua me urgjencë në Spitalin e Qendrës së New Yorkut, ku u shpall i vdekur pas CPR-së.
- DOJ dhe Komiteti Mbikëqyrës i Dhomës së Përfaqësuesve publikuan pamje të fshehura nga dosja, sipas Daily Mail.