Jeffrey Epstein, financieri amerikan i dënuar për krime seksuale, mbajti një rrjet të gjerë kontaktesh në Bruksel për rreth dhjetë vjet, sipas 3.5 milionë dokumenteve të publikuara së fundmi nga Departamenti i Drejtësisë i SHBA-së.
Dokumentet nxjerrin në pah udhëtime të përsëritura drejt kryeqytetit belg, selisë së institucioneve kryesore të Bashkimit Europian, si dhe korrespondencë me persona me ndikim dhe agjenci modelingu për gra në Evropë. Asnjë nga takimet e supozuara nuk ishte bërë e njohur më parë. Email-et dokumentojnë udhëtime të mundshme të Epstein-it dhe ndërmjetësve në emër të tij gjatë periudhës 2010-2019.
Prokurorët pretendojnë se Epstein "krijoi një rrjet të gjerë viktimash të mitura me qëllim shfrytëzimin e tyre seksual", ndërsa dokumentet tregojnë korrespondencë të përsëritur lidhur me gra në Evropë.
Sipas raportit të POLITICO-s, një email i vitit 2010 përshkruan Kelly C., të propozuar nga agjencia e modelingut Casting Factory në Bruksel. Mesazhi përmend përmasat trupore të saj dhe thekson se kishte "karakter shumë të mirë". POLITICO nuk identifikoi agjencinë, e cila nuk ka më faqe interneti aktive. Një vizitë në adresën pranë Bulevardit Louise në qendër të Brukselit zbuloi një ndërtesë të braktisur.
Në të njëjtën korrespondencë shfaqet një përfaqësues i MC2 Model Management, agjenci e bashkëthemeluar nga bashkëpunëtori i ngushtë i Epstein-it, Jean-Luc Brunel. Brunel u gjet i varur në qelinë e tij në një burg në Paris në vitin 2022, ku mbahej i arrestuar për akuza për përdhunim të të miturve dhe trafikim fëmijësh për shfrytëzim seksual. MC2 nuk vepron më.
Mesazhe të tjera përfshijnë shprehje si "Më mungon! Puthje nga Brukseli!" ("bisous" në frëngjisht), referenca për fluturime drejt Brukselit dhe video-telefonata me gra.