Dokumentet e publikuara së fundmi nga Departamenti Amerikan i Drejtësisë, në kuadër të hetimit për Jeffrey Epstein, zbulojnë akuza për përfshirjen e një shtetasi maqedonas, profesor në Universitetin e Kolumbias, në eksportimin e rreth 1000 trurash njerëzore nga Maqedonia drejt Shteteve të Bashkuara për eksperimente shkencore.
Në një email të datës 5 shkurt 2019, me titull "Ilaçi 50-vjeçar që mund të zgjidhë krizën e vetëvrasjeve në Amerikë", diskutohet furnizimi me trura nga Maqedonia, disa prej tyre të personave që kanë kryer vetëvrasje. Dokumentet nuk përmbajnë të dhëna mbi pëlqimin e familjeve të të ndjerëve apo njohuritë e institucioneve maqedonase për këtë proces.
Sipas përshkrimit, organet janë hequr menjëherë pas vdekjes, janë transportuar me avion nën eskortë speciale dhe më pas me anije për rreth 7500 kilometra në SHBA. Atje, trurat janë vendosur në kuti speciale me kode QR, me seksione të indeve të disektuara të etiketuara sipas anës dhe datës së marrjes.
Dokumentet përmendin gjithashtu shkencëtarë nga universitete amerikane si Pittsburgh, Columbia, New York dhe Yale, në kontekst të kërkimeve për shkaqet biologjike të vetëvrasjeve. Maqedonia përshkruhet si "vendi i vogël ballkanik" që siguron materialin falë profesor maqedonas, i cili ka ndihmuar në organizimin e procesit.
Këto zbulime lidhen me rrjetin e Jeffrey Epstein, i dënuar në 2008 në Florida për nxitje të të miturve në prostitucion dhe i akuzuar në 2019 për trafikim qenie njerëzore me qëllim shfrytëzim seksual. Epstein u gjet i vdekur në gusht 2019.