Presidenti i Shteteve të Bashkuara, Donald Trump, deklaroi se Irani i ka kërkuar administratës amerikane kthimin në tryezën e negociatave për një marrëveshje të re. Deklaratat u bënë gjatë kthimit të tij nga samiti i NATO-s në Ankara, ku ai u shpreh para gazetarëve në bordin e avionit presidencial Air Force One.
“Më telefonuan pak kohë më parë. Ata duan shumë të arrijnë një marrëveshje”, deklaroi Trump. Megjithatë, presidenti amerikan shprehu dyshime lidhur me seriozitetin e palës iraniane, duke u shprehur: “Nuk e di nëse janë të denjë për të bërë një marrëveshje. Nuk e di nëse do ta respektojnë atë”.
Lidhur me situatën ushtarake, Trump theksoi se SHBA kanë shkaktuar dëme të konsiderueshme dhe se tashmë kanë fituar përballjen ushtarake ndaj Teheranit. “Ne i goditëm shumë fort. Ushtarakisht kemi fituar tashmë dhe atyre u ka mbetur shumë pak”, shtoi ai.
Këto komente vijnë vetëm një ditë pasi kreu i Shtëpisë së Bardhë kishte deklaruar se armëpushimi ishte “i përfunduar” dhe se bisedimet me Iranin përbënin një “humbje kohe”. Deri më tani, autoritetet në Iran nuk kanë dhënë asnjë konfirmim zyrtar lidhur me kontaktet e pretenduara nga pala amerikane ose ndonjë kërkesë për rifillim të negociatave diplomatike.