Presidenti i Shteteve të Bashkuara, Donald Trump, ka zbuluar zyrtarisht aeroplanin e ri presidencial, të cilin e përshkroi si një "Shtëpi të Bardhë fluturuese". Në ceremoninë e zhvilluar në Bazën e Përbashkët Andrews, presidenti theksoi se mjeti është transformuar për të ofruar një nivel luksi të pashembullt.
Aeroplani, një Boeing 747 i konvertuar, zëvendëson ngjyrat tradicionale të epokës së Kennedy-t me një skemë të re që përfshin pjesën e poshtme në ngjyrë blu të errët, një vijë të kuqe përgjatë trupit dhe një flamur të madh amerikan në bisht. Vula presidenciale është vendosur pranë derës kryesore të hyrjes.
Ky mjet do të shërbejë si një aeroplan "urë" për udhëtimet e presidentit, derisa kompania Boeing të finalizojë dorëzimin e flotës së re, e cila parashikohet të jetë gati në vitin 2028. Kthimi nga samiti i G7 në Francë këtë javë ishte udhëtimi i fundit i planifikuar në bordin e aeroplanit të vjetër.
Donald Trump konfirmoi se aeroplani i ri do të përdoret për herë të parë në samitin e NATO-s, që do të mbahet muajin e ardhshëm në Ankara të Turqisë. Mjeti pritet të bëjë një fluturim demonstrativ gjatë festimeve të 4 Korrikut, ndërsa presidenti la të kuptohet se do ta përdorë atë edhe për pjesëmarrjen në samitin e Bashkëpunimit Ekonomik Azi-Paqësor në Kinë, që do të zhvillohet në nëntor.