Donika Gërvalla mban sot konferencë për media

Zëvendëskryeministrja dhe ministrja e Punëve të Jashtme, Donika Gërvalla, do të zhvillojë sot një konferencë për përfaqësuesit e mediave. Sipas njoftimit zyrtar të Ministrisë së Punëve të Jashtme, aktiviteti do të nisë në orën 14:00 në ndërtesën e ish-Rilindjes, kati i nëntë, zyra 914. Institucioni nuk ka bërë të ditur arsyen ose temën specifike që do të trajtohet gjatë këtij komunikimi. Dalja e ministres Gërvalla përpara mediave pason njoftimin e saj të një dite më parë, lidhur me procedimin në Qeveri të projektligjit për Byronë Shtetërore për Verifikimin dhe Konfiskimin e Pasurisë së Pajustifikueshme. Ministrja ka theksuar se jetësimi i kësaj nisme mbetet prioritet. Konferenca zhvillohet në një periudhë me zhvillime të ndjeshme politike, pas shpalljes së aktgjykimit të shkallës së parë nga Dhomat e Specializuara të Hagës ndaj ish-krerëve të UÇK-së. Në sheshet e kryeqytetit po zhvillohen protesta në mbështetje të të dënuarve, ku pjesëmarrësit kanë kërkuar dorëheqjen e ministres Gërvalla, duke iu referuar pretendimeve mbi dokumente të mëparshme për të cilat ajo është akuzuar se i ka dërguar në Hagë.