Pas përplasjeve të ndodhura gjatë protestës para Parlamentit, një numër punonjësish të policisë dhe protestuesish kanë kërkuar ndihmë mjekësore në institucionet shëndetësore të kryeqytetit. Sipas njoftimeve zyrtare, në Spitalin Universitar të Traumës (SUT) u trajtuan 15 efektivë dhe 2 protestues, ndërsa në Qendrën Spitalore Universitare “Nënë Tereza” (QSUT) u paraqitën për ndihmë mjekësore edhe 1 efektiv tjetër dhe 2 protestues të tjerë.
Drejtori i Përgjithshëm i Policisë së Shtetit, Drejtues Madhor Skënder Hita, zhvilloi një vizitë në Spitalin e Traumës për të biseduar me mjekët dhe punonjësit e lënduar. Gjatë këtij takimi, Hita shprehu mirënjohjen për profesionalizmin dhe përkushtimin e forcave të rendit në përballimin e situatës, duke dënuar sulmet me gurë, sende të forta dhe mjete piroteknike ndaj tyre.
Sipas informacioneve, nga 15 efektivët e trajtuar në SUT, katër prej tyre vijojnë të jenë nën kujdesin e mjekëve, ndërsa të tjerët janë larguar pas marrjes së ndihmës së nevojshme. Po ashtu, edhe protestuesit dhe efektivët e trajtuar në QSUT janë larguar nga spitali pasi kanë marrë shërbimin mjekësor.
Skënder Hita siguroi efektivët për mbështetjen e plotë të institucionit të policisë, duke theksuar se detyra e tyre do të vijojë me vendosmëri në mbrojtje të rendit dhe sigurisë publike, në zbatim të ligjit dhe pa asnjë kompromis.