Drejtori i Hekurudhës Shqiptare, Ergys Verdho, është paraqitur këtë të premte në ambientet e Prokurorisë së Posaçme kundër Korrupsionit dhe Krimit të Organizuar (SPAK). Ai është shoqëruar nga avokati i tij, ndërsa paraqitja e tij ndodh një ditë pas përshkallëzimit të hetimeve nga ana e organit të akuzës ndaj ish-zv.kryeministres Belinda Balluku.
Sipas informacioneve, Verdho është thirrur nga prokurori Dritan Prençi, i cili po heton dosjen "Balluku". Hetimet për këtë çështje përfshijnë dyshime për korrupsion dhe pastrim parash, ndërsa së fundmi është vendosur edhe sekuestro për një vilë në Dhërmi. Për të njëjtën dosje, SPAK ka vënë në akuzë për pastrim parash edhe ish-lojtarin e kombëtares, Igli Tare.
Kjo paraqitje shënon herën e dytë që Verdho shkon në SPAK brenda një harku të shkurtër kohor. Më 21 maj, ai ishte thirrur sërish nga prokuroria, por pas daljes nga institucioni nuk dha prononcim për mediat. Atëherë, ai kishte deklaruar se ishte thirrur në cilësinë e "personit në dijeni për një çështje të vjetër".
Ergys Verdho mban aktualisht postin e kreut të Hekurudhës Shqiptare prej fillimit të vitit 2024. Më herët, ai ka shërbyer në detyra të tjera drejtuese:
- Drejtor i Autoritetit Rrugor Shqiptar (ARRSH): korrik 2018 – maj 2021
- Drejtor i Korporatës Elektroenergjetike Shqiptare (KESH): maj 2021 – mars 2024