Driton Kuka, trajner i xhudos, kërkoi më 21 tetor krijimin e Këshillit Kombëtar të Sportit, për të përcaktuar përparësitë dhe hartuar një strategji të qartë për zhvillimin e sportit në Kosovë. Në një reagim publik, ai tha se mungesa e rezultateve në sportin kosovar po krijon shqetësim për gjeneratat e reja.
Kuka kritikoi natyralizimin e sportistëve, përfshirë fëmijët, dhe tha se kjo praktikë nuk duhet të shndërrohet në strategji të Ministrisë së Rinisë dhe Sportit apo të Komitetit Olimpik të Kosovës (KOK). Sipas tij, natyralizimet mund të jenë të arsyeshme në raste të caktuara, nëse bëhen mbi kritere të qarta dhe sportisti shihet si përforcim për ekipin.
“E kuptoj që ka dhe do të ketë natyralizime dhe kjo do të duhej të bëhej me kritere shumë të qarta. Nëse një sport ka nivel dhe një sportist shihet si përforcim i ekipit, jemi në rregull, por jo ndryshe”, shkroi Kuka.
Trajneri përmendi Majlinda Kelmendin, Nora Gjakovën, Distria Krasniqin, Donjeta Sadikun dhe Akil Gjakovën si shembuj të sportistëve që dëshmojnë se Kosova mund të zhvillojë talente vendore dhe të nxjerrë garues të nivelit të lartë. Ai tha se vendi ka potencial për të fituar medalje në garat evropiane, botërore dhe olimpike.
Kuka rikujtoi tri medaljet e arta olimpike të Kosovës në xhudo, të fituara nga Majlinda Kelmendi, Distria Krasniqi dhe Nora Gjakova. Ai tha se medaljet u ndërtuan në Pejë me sportiste të lindura dhe të rritura në Kosovë, duke vënë në pah kontributin e qytetit në përgatitjen e kampioneve.
Kuka kërkoi që Këshilli Kombëtar i Sportit të ndihpe në përcaktimin e përparësive dhe hartimin e një strategjie të qartë për zhvillimin e sportit.