Një dron i paidentifikuar dyshohet se ka shkelur hapësirën ajrore të Finlandës në zonën e Virolahtit, pranë kufirit me Rusinë, mëngjesin e 3 majit. Ministria finlandeze e Mbrojtjes bëri të ditur se Forcat Ajrore e kishin pikasur fluturakën në orët e para të mëngjesit.
Autoritetet finlandeze thanë se modeli dhe origjina e dronit nuk janë identifikuar ende. Fluturaka nuk ndodhet më në hapësirën ajrore finlandeze. Incidenti po hetohet nga roja kufitare finlandeze, pa dhënë detaje të tjera.
Finlanda ndan një kufi tokësor prej 1.340 kilometrash me Rusinë.
Ministria ruse e Mbrojtjes njoftoi të dielën se njësitë e saj ajrore kishin rrëzuar 334 dronë ukrainas gjatë natës në rreth 15 rajone ruse, disa prej tyre pranë Shën Petersburgut, rreth 150 kilometrash larg Virolahtit.
Në mars, Ukraina i kishte kërkuar falje Helsinkit pasi dy dronë ukrainas u rrëzuan në jug të Finlandës, që me gjasë devijuan nga kursi për shkak të ndërhyrjes ruse.
Në të kaluarën, disa vende evropiane kanë raportuar shkelje të dyshuara të hapësirës së tyre ajrore nga ana ruse.