Autoritetet ruse kanë njoftuar se dronë ukrainas kanë sulmuar rafinerinë e naftës në qytetin rus të Tuapse, pranë Detit të Zi, duke shkaktuar një zjarr të madh.
Në javët e fundit, Ukraina ka kryer sulme të njëpasnjëshme me dronë ndaj rafinerisë, në pronësi të Rosneft, dhe portit të Tuapse. Këto sulme kanë rezultuar me derdhje nafte në det dhe zjarre që kanë kërkuar ditë për t’u shuar. Sipas burimeve ruse, sulmi i fundit ka goditur edhe terminalin e eksportit, duke ndezur sërish zonën e depozitimit të karburantit.
Rafineria, e cila prodhon kryesisht produkte nafte për eksport, ka qenë jashtë funksionit që nga 16 prilli pas një sulmi tjetër me dronë, sipas burimeve nga industria ruse e naftës. Ajo ka një kapacitet vjetor prodhimi prej rreth 12 milionë tonësh metrikë, ose 240 mijë fuçi në ditë.
Ky zhvillim vjen në kushtet kur Ukraina ka intensifikuar sulmet ndaj infrastrukturës energjetike ruse që nga muaji mars. Bisedimet e paqes, të ndërmjetësuara nga SHBA, kanë ngecur, ndërsa vëmendja e Uashingtonit është zhvendosur drejt tensioneve në Lindjen e Mesme, përfshirë luftën në Iran.
Ekipet e pastrimit kanë hequr rreth 2.500 metra kubikë tokë të ndotur, ndërsa derdhja e naftës po zhvendoset drejt bregdetit dhe zonave turistike.