Autoritetet në Dubai kanë marrë vendimin për ekstradimin e shtetasit Denis Matoshi, i njohur gjithashtu me emrin Eldi Dizdari dhe pseudonimet “shqiptari i gjatë” apo “Alduth”. Ky vendim i hap rrugën transferimit të 37-vjeçarit drejt Belgjikës, ku ai do të vuajë dënimin e dhënë nga drejtësia belge për përfshirje në trafikun ndërkombëtar të lëndëve narkotike.
Sipas raportimeve të medias belge “Gazet van Antwerpen”, Matoshi është dënuar me 10 vite burg nga gjykata e Anversës për rolin e tij në organizatën kriminale të njohur si Kompania Bello. Kjo organizatë është hetuar prej vitesh nga autoritetet belge për rolin e saj në trafikimin e kokainës nga Amerika Latine drejt porteve europiane.
Në Shqipëri, Matoshi është në qendër të hetimeve nga SPAK-u, ku dyshohet si pjesë e grupit kriminal që ka transportuar të paktën 50 tonë kokainë. Në kuadër të hetimeve pasurore të nisura në vitin 2020, Prokuroria e Posaçme ka evidentuar se ai ka përfituar një pronë me sipërfaqe prej 500 metrash katrorë në rrugën “Dervish Hima” në Tiranë, pranë stadiumit “Air Albania”, si dhuratë nga shtetasit Qefsere Grori, Eqerem Grori dhe Osman Dervishi.