Zëvendësministri i Punëve të Brendshme, Enver Dugolli, ka zhvilluar sot një vizitë në ambientet e Qendrës Kombëtare për Menaxhimin e Kufirit (QKMK), ku u prit nga koordinatori i saj, Samir Krasniqi.
Gjatë kësaj vizite, Enver Dugolli është informuar nga afër për funksionimin e QKMK-së, aktivitetet e përditshme në kuadër të menaxhimit të integruar të kufirit, si dhe për bashkëpunimin ndërinstitucional mes tri agjencive shtetërore përgjegjëse për menaxhimin e kufijve të Republikës së Kosovës.
Në takim është vlerësuar progresi i vazhdueshëm i QKMK-së, i cili është arritur falë investimeve të Qeverisë së Kosovës dhe mbështetjes së donatorëve ndërkombëtarë, në veçanti të Shteteve të Bashkuara të Amerikës. U theksua se këto investime kanë ndikuar drejtpërdrejt në forcimin e kapaciteteve për luftimin e krimit, me fokus të veçantë krimin ndërkufitar.
Enver Dugolli përgëzoi stafin për rezultatet e arritura dhe shprehu gatishmërinë për të mbështetur iniciativat që synojnë avancimin e mëtejshëm të Qendrës, modernizimin e kapaciteteve dhe përmirësimin e metodave të punës. Ai gjithashtu riafirmoi përkushtimin e Ministrisë së Punëve të Brendshme për forcimin e mëtejshëm të kapaciteteve të QKMK-së, me synim rritjen e efikasitetit në menaxhimin e kufijve shtetërorë dhe luftimin e dukurive kriminale.