Armand Duka, presidenti i Federatës Shqiptare të Futbollit (FSHF), dhe përzgjedhësi i Shqipërisë, Ronaldo Maran, ishin të pranishëm në ndeshjen mes Grasshopperit dhe Vaduzit në Zvicër, e cila përfundoi në barazim 2-2. Sipas raportimeve të Blick, në stadium ndodhej një delegacion i FSHF-së për të ndjekur nga afër Samuel Krasniqin, futbollist i Grasshopperit, dhe Lutfi Dalipin, futbollist i Vaduzit.
Krasniqi është 21 vjeç, ndërsa Dalipi 20 vjeç. Të dy kanë qenë pjesë e kombëtares U-21 të Zvicrës gjatë ndeshjeve të fundit ndërkombëtare. Megjithatë, asnjëri nuk ka vendosur ende se cilën kombëtare do të përfaqësojë në të ardhmen. Përveç Zvicrës dhe Shqipërisë, të dy mund të zgjedhin edhe Kosovën.
Trajnerët flasin për vëmendjen ndaj lojtarëve
Trajneri i Vaduzit, Marc Schneider, tha se deri në verë pak njerëz e njihnin Dalipin, ndërsa tani futbollisti po merr shumë vëmendje. Sipas Schneiderit, kjo situatë nuk është e lehtë për një lojtar të ri dhe klubi duhet ta mbështesë e ta mbrojë. Ai tha gjithashtu se duhet të bisedojnë me Dalipin për pritshmëritë ndaj tij.
Trajneri i Grasshopperit, Olaf Janssen, tha se futbollistët e rinj kanë nevojë për mbështetje dhe se mbetet për t’u parë nëse vëmendja do të ndikojë në sjelljen e tyre. Ai u shpreh se po përpiqet t’ia lehtësojë presionin Krasniqit dhe se lojtari ka mbështetjen e tij dhe të ekipit.
Janssen tha gjithashtu se Krasniqi ndonjëherë përpiqet të bëjë gjithçka vetë, gjë që mund ta pengojë në lojë. Sipas trajnerit, futbollisti ka ende potencial të pashfrytëzuar plotësisht.
Top Channel raportoi se në ndeshje ishte i pranishëm edhe Amir Abrashi, i cili regjistroi paraqitjen e tij të 300-të me Grasshopperin. Sipas të njëjtit burim, Dalipi u aktivizua në takim.