Armand Duka, presidenti i Federatës Shqiptare të Futbollit (FSHF), ka reaguar pas humbjes 2-1 të Kombëtares shqiptare ndaj Polonisë në ndeshjen e play-off-it për Botërorin 2026, që shënoi eliminimin e Shqipërisë.
Në një postim në rrjetet sociale, Duka u drejtua lojtarëve dhe tifozëve, duke thënë se humbja dhemb, por nuk zbeh krenarinë. Ai e quajti këtë grup lojtarësh skuadrën më të fortë dhe më të bukur në historinë e futbollit shqiptar.
Duka nënvizoi karakterin dhe shpirtin e treguar në fushë si premtim për të ardhmen. "Sonte nuk është një natë për të ulur kokën. Përkundrazi. Është një natë për të qëndruar drejt dhe për t’u mburrur me këtë skuadër, me këta djem që në çdo minutë të lojës tregojnë shpirt, karakter dhe atë gjë që nuk mësohet. Gjakun shqiptar", shkroi ai.
Më tej, Duka shtoi: "Po, kjo humbje dhemb. Dhemb sepse na ndërpret një ëndërr që e kemi ndërtuar prej vitesh dhe që sot dukej më pranë se kurrë. Por ajo që këta djem treguan në fushë është më shumë se një rezultat. Është një premtim. Është prova se kjo është, pa asnjë dyshim, skuadra më e fortë dhe më e bukur që kemi pasur ndonjëherë."
Ai përfundoi me falënderime: "Faleminderit që na bëtë të besojmë. Faleminderit që na bëtë të ëndërrojmë. Sot, çuna, nuk ka humbje që e zbeh krenarinë që ndjej për ju."