Dukagjini, fitues i Kupës së Kosovës, është mposhtur me rezultat 1-0 në transfertën ndaj Luganos, në ndeshjen e parë të raundit të dytë kualifikues të Ligës së Konferencës.
Goli i vetëm i takimit u realizua nga Renato Steffen në minutën e 31-të, pas një asistimi nga Behrens. Ndonëse skuadra zvicerane krijoi më shumë raste dhe mbajti posedimin e topit, Dukagjini pati mundësinë për të barazuar rezultatin në minutën e 65-të, kur sulmuesi Jeudi Stevenson qëlloi shtyllën.
Në minutat e fundit të ndeshjes, ekipi nga Klina mbeti me një lojtar më pak, pasi mesfushori Arvanit Rexhaj, i cili u aktivizua në minutën e 80-të, u ndëshkua me karton të kuq në minutën e 87-të për shkak të një ndërhyrjeje.
Për Luganon u aktivizuan si titullarë shqiptarët Uran Bislimi dhe Ezgjan Alioski, ku ky i fundit u zëvendësua në minutën e 68-të. Rezultati minimal mban gjallë shpresat e Dukagjinit për kualifikim në ndeshjen e kthimit, e cila do të zhvillohet pas një jave në Kosovë.
Përditësime
Nën drejtimin e trajnerit Arsim Thaçi, Dukagjini u përball me Luganon në Ligën e Konferencës. Në minutat e fundit, mesfushori Mërgim Pefqeli rrezikoi portën zvicerane me një goditje të fuqishme nga distanca.