Gjatë javës së fundit, Policia Rrugore e Durrësit ka zhvilluar një operacion të shtuar monitorimi në akset rrugore kryesore, si dhe në pikat hyrëse e dalëse të qytetit, me qëllim rritjen e parametrave të sigurisë rrugore dhe menaxhimin e trafikut.
Sipas njoftimit zyrtar, kontrollet u realizuan përmes përdorimit të pajisjeve inteligjente dhe vëzhgimit nga ajri me dronë. Bilanci javor pasqyron arrestimin e 17 shtetasve për shkelje të ndryshme të Kodit Rrugor, ndërsa janë sanksionuar me masë administrative 1.807 drejtues mjetesh.
Ndër shkeljet kryesore të konstatuara dallohen:
• 1.269 masa për tejkalim të normave të shpejtësisë;
• 442 masa për ndalim, pushim ose qëndrim të gabuar të mjetit;
• 39 masa për parakalime të gabuara;
• 35 masa për mosvendosje të rripit të sigurimit;
• 13 masa për drejtim të mjetit nën efektin e alkoolit;
• 9 masa për përdorim të celularit gjatë drejtimit.
Policia theksoi se fokusi i veçantë i operacionit ka qenë ndëshkimi i drejtimit të mjetit në gjendje të dehur dhe parkimet dyshe, të cilat krijojnë pengesa në qarkullim. Për këto shkelje, gjatë javës janë vënë në pranga 10 shtetas. Autoritetet bënë thirrje për respektim rigoroz të rregullave të qarkullimit, si një kontribut për mbrojtjen e jetës dhe shëndetit të përdoruesve të rrugës.