Policia e Durrësit ka vënë në pranga 38-vjeçarin Admir Ndoja, pasi dyshohet si autori i zjarrit masiv që përfshiu një magazinë të një subjekti privat në lagjen nr. 14 të qytetit. Sipas hetimeve të Strukturave për Hetimin e Krimeve, i arrestuari kishte ndezur zjarr për të djegur disa barishte dhe kartona në afërsi të objektit, por flakët dolën jashtë kontrollit duke u përhapur me shpejtësi në ambientet e brendshme.
Magazina, e cila shërbente për ruajtjen e fishekzjarrëve dhe lodrave për fëmijë, pësoi dëme të konsiderueshme materiale. Gjatë operacionit për izolimin e vatrës së zjarrit, 2 zjarrfikës pësuan asfiksim dhe u dërguan në spital për të marrë ndihmën e nevojshme mjekësore, ku ndodhen nën kujdesin e mjekëve.
Ngjarja shkaktoi ndërprerje të furnizimit me energji elektrike në një pjesë të qytetit të Durrësit, pasi autoritetet vendosën stakimin e linjave elektrike për arsye sigurie, duke përfshirë rrjetin e tensionit 110 kV në zonën e Shkozetit. Materialet procedurale i janë referuar Prokurorisë pranë Gjykatës së Shkallës së Parë të Juridiksionit të Përgjithshëm Durrës për hetime të mëtejshme mbi rrethanat e ngjarjes.