Autoritetet britanike kanë ngritur akuza ndaj dy shtetasve iranianë për përgatitjen e një akti terrorist ose ndihmën ndaj një personi tjetër për realizimin e tij. Hetuesit e policisë kundër terrorizmit pretendojnë se të dyshuarit, Rahman Salehi (35 vjeç) dhe Salam Ahmadyan (36 vjeç), synonin të përdornin një pajisje shpërthyese të improvizuar për të goditur komunitetin hebre në Mançester.
Sipas hetimeve, të dyshuarit kishin përdorur aplikacione të koduara për të siguruar komponentë, kishin grumbulluar lëngje dhe pajisje, si dhe kishin ndjekur udhëzime në video për montimin e mjetit shpërthyes. Gjithashtu, ata kishin kryer kërkime në internet për objektiva të mundshëm, kishin mbledhur harta dhe kishin zhvilluar veprime zbulimi në terren. Dukagjini raporton se hetuesit dyshojnë se dy personat kanë qenë në kontakt me një person të tretë që ndodhet jashtë vendit, me gjasë në Iran.
Arrestimi i tyre u krye më 20 shtator në Newton Street, në zonën Northern Quarter të Mançesterit, pak ditë para festës së Yom Kippur. Pas ndalimit, ata u dërguan në paraburgim në një komisariat në Londër, ndërsa autoritetet kanë zhvilluar kontrolle në prona të tjera në Epworth Street në Liverpool dhe Lancaster Road në Salford.
Vicki Evans, koordinatore e lartë kombëtare e policisë kundër terrorizmit, deklaroi se operacioni kishte penguar një kërcënim serioz dhe paralajmëroi për rreziqe të tjera të lidhura me Iranin që po projektohen ndaj Mbretërisë së Bashkuar. Ajo sqaroi se ky rast nuk ka lidhje me hetimin që po zhvillohet për incidentin në bazën ajrore RAF Fairford. Sekretarja e Brendshme britanike, Shabana Mahmood, theksoi se këto arrestime shërbejnë si një kujtesë për kërcënimin e vazhdueshëm që vjen nga terroristët dhe aktorët e huaj shtetërorë ndaj komuniteteve në vend.