Dy persona janë arrestuar në Prishtinë për ndezje fishekzjarrësh pranë hotelit ku qëndron Kombëtarja turke e futbollit. Ngjarja ndodhi mbrëmjen e së hënës, rreth orës 01:00 pas mesnate.
Zëdhënësi i Policisë së Kosovës për rajonin e Prishtinës, Enis Pllana, konfirmoi arrestimin. Rasti është cilësuar si “Shkaktim i rrezikut të përgjithshëm” dhe të dyshuarit janë dërguar në mbajtje për 48 orë.
Policia reagoi menjëherë pas sinjalizimit për fishekzjarrët në afërsi të hotelit. Pamje nga rrjetet sociale tregojnë fishekzjarrët e ndezur në atë zonë.
Ngjarja vjen në prag të ndeshjes Kosovë-Turqi, e cila zhvillohet sonte në stadiumin “Fadil Vokrri” në Prishtinë, me fillim në orën 20:45. Ndeshja është pjesë e finaleve të play-off për kualifikim në Kupën e Botës.