Prodhimi neto vendas i energjisë elektrike arriti 3.647 GWh në tremujorin e parë të vitit 2026, nga 2.234 GWh një vit më parë, duke shënuar rritje prej 63,2 për qind. Rritja u mbështet kryesisht nga hidrocentralet publike dhe ato private e koncesionare.
Eksporti bruto i energjisë elektrike, përfshirë shkëmbimet, arriti 1.503 GWh, nga 732 GWh në të njëjtën periudhë të vitit 2025, me rritje 105,4 për qind. Në të njëjtën kohë, importi bruto ra në 327 GWh, nga 767 GWh, duke reflektuar tkurrje prej 57,4 për qind. Bilanci i shkëmbimit rezultoi pozitiv në nivelin 1.177 GWh.
Prodhimi nga burime të rinovueshme, kryesisht fotovoltaikë, arriti 254 GWh, me rritje 44 për qind. Konsumi nga konsumatorët u rrit me 9,1 për qind në 1.954 GWh, ku familjarët shënuan rritje 8,8 për qind dhe bizneset 9,5 për qind.
Humbjet në rrjet arritën 516 GWh, me rritje 8 për qind, ndërsa pesha e tyre ndaj energjisë në dispozicion u ul lehtë në 20,9 për qind.