Ministri i Infrastrukturës dhe Energjisë, Enea Karakaçi, së bashku me administratorin e OSSH, Blendian Dalipi, dhe ambasadorin gjerman në Tiranë, Karl Bergner, inspektuan punimet në zonën e Valiasit për ndërtimin e nënstacionit të ri elektrik në bashkinë Kamëz. Aktualisht, projekti ka përfunduar në masën 40%.
Investimi synon zëvendësimin e infrastrukturës së vjetër të vitit 1968, duke kaluar në standardin 110/20 kV. Ky modernizim është vlerësuar si i domosdoshëm për përballimin e zhvillimeve urbane në zonat e Kamzës, Paskuqanit, Laknasit dhe Çekrezit. Projekti parashikon vendosjen e fiderave të rinj 20 kV, duke garantuar shërbim më të qëndrueshëm për rreth 5 mijë abonentë.
Ky investim është pjesë e një programi bashkëpunimi me qeverinë gjermane, me një vlerë të përgjithshme prej 30 milionë eurosh. Përveç ndërtimit të nënstacionit në Kamëz, i cili mbështetet me një fond prej 13 milionë eurosh për fiderat e rinj, programi përfshin dixhitalizimin e nënstacioneve, zhvillimin e sistemit SCADA dhe rehabilitimin e 12 nënstacioneve të tjera në vend. Punimet për nënstacionin e ri kanë nisur në tetor të vitit 2025 dhe pritet të finalizohen plotësisht brenda muajit mars 2027.