Kryeministri dhe kryetari i Partisë Socialiste, Edi Rama, ka mbërritur sot në selinë e partisë për takimin e paralajmëruar me drejtuesit politikë të qarqeve. Mbledhja, e cila ishte parashikuar të niste në orën 08:30, vjen pas takimit të zgjeruar të kryeministrit me qeverinë dhe grupin parlamentar socialist.
Pas përfundimit të këtij takimi, axhenda e kryeministrit Rama vijon me një tjetër mbledhje, këtë herë me kryebashkiakët. Takimi është planifikuar të zhvillohet në orën 09:30 tek ish-hoteli Dajti në Tiranë.
Këto zhvillime politike zhvillohen në një periudhë kur kryeqyteti po përballet me protesta të vazhdueshme, të cilat kanë hyrë në javën e tretë. Në takimet e fundit, Rama ka kërkuar nga deputetët një angazhim më të madh në rrjetet sociale, ndërsa ka diskutuar edhe mbi çështje të investimeve, përfshirë projektin në zonën e Zvërnecit.
Përditësime
Kryeministri Edi Rama refuzoi dorëheqjen, duke i cilësuar protestat – tashmë në ditën e 24-të – si përpjekje për vëmendje. Gjatë takimit me drejtuesit e qarqeve dhe kryebashkiakët, ai akuzoi eksponentë të Vetëvendosjes në Kosovë dhe koalicionit VLEN në Maqedoninë e Veriut për nxitjen e trazirave. Pas mbledhjes së kryesisë, grupi parlamentar i Partisë Socialiste nisi një fushatë kundër organizatorëve të protestës.