Juventusi ka barazuar 3-3 me Romën në ndeshjen e javës së 27-të të Serie A, të luajtur në stadiumin "Olimpico" të Romës. Sulmuesi kosovar Edon Zhegrova kishte rol vendimtar si zëvendësues, duke hyrë në lojë në minutën 72 në vend të Francisco Conceicaos dhe duke kontribuar në dy gola të skuadrës së tij.
Ndeshja filloi me një mundësi të hershme për Romën, ku Lorenzo Pellegrini goditi shtyllën. Vendasit kaluan në epërsi me supergolin e Wesley Franças në minutën 39. Juventusi u përgjigj menjëherë në fillim të pjesës së dytë, kur Francisco Conceicao shënoi nga afërsia në minutën 47 pas një topi të kthyer.
Roma rifitoi avantazhin me golin e Evan Ndickas nga harkimi i Pellegrinit (54) dhe më pas Donyell Malen realizoi pas asistimit të Kones (65), duke e çuar rezultatin në 3-1.
Hyrja e Zhegrovës ndryshoi dinamikën. Në minutën 78, ai harkoi nga krahu i djathtë, topi u kthye nga mbrojtja dhe Jeremie Boga e dërgoi në rrjetë për 3-2. Në minutën 90+3, sërish nga harkimi i Zhegrovës, Federico Gatti përfitoi një top të kthyer për të barazuar rezultatin.
Pas këtij barazimi, Roma zë vendin e 4-të me 51 pikë, ndërsa Juventusi është i 6-ti me 47 pikë.
Përditësime
Edon Zhegrova ekzekutoi goditjen e lirë nga e cila Gatti shënoi në 90+3', jo harkimin siç raportohej më parë.