Futbollisti i përfaqësueses së Kosovës, Edon Zhegrova, përgatitet për një rikthim emocional në stadiumin ku hodhi hapa të rëndësishëm në karrierën e tij si profesionist. Të shtunën, në stadiumin St. Jakob-Park, ai do të përballet me ish-skuadrën e tij, FC Basel 1893, në një ndeshje miqësore si lojtar i Juventusit.
Klubi zviceran i ka kushtuar një postim të veçantë 26-vjeçarit, duke vlerësuar kontributin e tij. Në një intervistë për faqen zyrtare të klubit, Zhegrova e cilësoi Baselin si një kapitull shumë të rëndësishëm për formimin e tij si futbollist dhe si person.
"Baseli ishte një kapitull shumë i rëndësishëm në karrierën time. Kam shumë kujtime të bukura me klubin, qytetin dhe tifozët. Do të jetë kënaqësi të shoh përsëri fytyra të njohura", u shpreh ai.
Duke reflektuar mbi rrugëtimin e tij, Zhegrova vlerësoi evolucionin e tij profesional pas përvojave në Francë dhe Itali. Ai theksoi se është shndërruar në një lojtar më të pjekur, duke vënë theksin te disiplina, qëndrueshmëria dhe vendimmarrja në fushë. Për edicionin e ri në Serie A, sulmuesi synon të kontribuojë me gola, asistime dhe punë të palodhur për suksesin e skuadrës torineze.
Gjatë periudhës së tij te FC Basel, Zhegrova zhvilloi 64 ndeshje dhe shënoi 12 gola, ndërsa pas transferimit te Lille, ai regjistroi 107 ndeshje, 26 gola dhe 18 asistime.