Skuadra e Egnatias ndodhet në Slloveni për të zhvilluar ndeshjen vendimtare të raundit të dytë kualifikues në Champions League kundër kampionëve të Sllovenisë, Celje. Pas rezultatit 3-3 në ndeshjen e parë, e cila ishte e mbushur me dinamikë dhe gola, kualifikimi mbetet i hapur për të dyja palët.
Trajneri Nevil Dede, i cili u shfaq në konferencë për shtyp së bashku me mesfushorin Altin Kryeziu, ka theksuar se sfida do të vendoset nga detajet dhe kujdesi për të shmangur gabimet. Egnatia synon të përmirësojë paraqitjen në repartin mbrojtës, ndërsa vë bast te efikasiteti i sulmit, i cili ka qenë vendimtar në rrugëtimin e tyre europian këtë verë. Për këtë përballje, skuadra shqiptare duhet të bëjë llogaritë pa Jurguens Montenegro, Soumaila Bakajoko dhe Zamiq Alijev.
Nga ana tjetër, Celje vjen në këtë përballje me një potencial të provuar sulmues. Statistikat nga ndeshja e parë treguan një baraspeshë në goditjet në portë dhe një lojë të dominuar nga momentet individuale. Skuadra sllovene do të jetë pa Jost Pisek, i cili mbetet jashtë fushës prej kohësh.
Ky takim vlerësohet si një moment historik për klubin rrogozhinas, pasi kalimi në raundin e tretë eliminator do të përbënte një arritje të re për ekipin pas eliminimit të Petrocub në turin e parë. Nëse Egnatia siguron kualifikimin, ajo do të vazhdojë rrugëtimin në kompeticion për t'u përballur me fituesin e çiftit Ararat - Shamrock Rovers.
Përditësime
Agjencitë ndërkombëtare të basteve e konsiderojnë Celjen favorite për ndeshjen në stadiumin 'Z’dezele Stadion'. Fitorja e sllovenëve kuotohet me 1.44, barazimi me 4.33, ndërsa triumfi i Egnatias vlerësohet me koeficientin 6.50, çka pasqyron vështirësinë e kësaj përballjeje për kampionët e Shqipërisë.
Trajneri Nevil Dede ka publikuar formacionet zyrtare për sfidën vendimtare kundër Celjes në Champions League. Një kualifikim i mundshëm do t'i garantojë Egnatias pjesëmarrjen në fazën e grupeve të Ligës së Konferencës, pavarësisht ecurisë së mëtejshme në kompeticionin aktual.