Në Nyon të Zvicrës është hedhur shorti për fazën play-off të UEFA Europa League, ku është përcaktuar rruga e mundshme për kampionët e Shqipërisë, skuadrën e Egnatias. Nëse ekipi i drejtuar nga trajneri Nevil Dede arrin të eliminojë irlandezët e Shamrock Rovers në turin e tretë kualifikues, ata do të përballen me fituesit e Kupës së Norvegjisë, klubin Lillestrom. Ndeshjet e para të kësaj faze janë planifikuar të zhvillohen më 20 gusht, ndërsa sfidat e kthimit një javë më vonë, më 27 gusht.
Sfidat për Egnatian në arenën ndërkombëtare vijnë në një moment delikat për skuadrën rrogozhinase. Përballja e parë kundër Shamrock Rovers do të luhet të martën, më 4 gusht, në orën 21:00 në “Tallaght Stadium” të Dublinit. Përgatitjet e skuadrës kanë hasur vështirësi, pasi kapiteni Arbenit Xhemajli është larguar drejt Malajzisë, ndërsa sulmuesi Bakajoko do të mungojë për një kohë të gjatë për shkak të një dëmtimi të rëndë në gju, që kërkon ndërhyrje kirurgjikale.
Kualifikimi përballë irlandezëve mban një rëndësi të veçantë për Egnatian, pasi do të siguronte jo vetëm një vend në play-off-in e Europa League, por edhe një prani të garantuar në play-off-in e UEFA Conference League, në rast disfate të mëtejshme. Kjo mundësi vlerësohet si një hap historik për klubin dhe për futbollin shqiptar, duke shtuar prestigjin dhe të ardhurat financiare për ekipin.
Ndërkohë, në të njëjtën ceremoni të zhvilluar në Nyon, është hedhur edhe shorti për fazën play-off të UEFA Champions League, ku janë përcaktuar 7 çiftet që do të luftojnë për të kompletuar grupin e 36 skuadrave në fazën e ligës. Këto takime janë programuar të luhen më 18-19 gusht dhe 25-26 gusht.
Përditësime
Klubi i Egnatias ka zyrtarizuar shitjen e Arben Xhemajlit në kampionatin malazez, transaksion që i siguron arkës së klubit 100 mijë euro. Përtej lëvizjeve në merkato, rrogozhinasit kanë mësuar kundërshtarin e mundshëm për fazën play-off të Conference League në rast eliminimi nga Europa League: ai do të jetë humbësi i çiftit KuPS Kuopio - U. Craiova. Shorti i mbajtur në Nyon ka përcaktuar gjithashtu rrugëtimin e ekipeve të tjera shqiptare, Dinamo, Shkëndija dhe Drita, në të njëjtin kompeticion.
Nën drejtimin e trajnerit Ilir Daja, Dinamo përballet sot në transfertë me skuadrën letoneze Auda, në orën 18:00. Kundërshtari vjen pas eliminimit surprizë të Steaua-s së Bukureshtit, duke e bërë këtë duel një test vendimtar për kryeqytetasit.