Ekonomia e Iranit ka hasur në vështirësi tash e shumë vite për shkak të sanksioneve ndërkombëtare dhe keqmenaxhimit administrativ. Gjendja është përkeqësuar edhe më shumë pas sulmeve të nisura nga Shtetet e Bashkuara dhe Izraeli më 28 shkurt.
Infrastruktura veçse e rrënuar ishte në shënjestër, duke bërë që fabrika e uzina çeliku të dalin jashtë funksioni, ndërsa ura e porte të jenë të papërdorshme. Objektet e naftës dhe gazit janë goditur gjithashtu, ndërsa bllokada amerikane ndaj porteve iraniane ka ndërprerë pothuajse plotësisht eksportin e naftës, burimin kryesor të të ardhurave të Teheranit.
Monedha iraniane ka rënë në nivele historikisht të ulëta kundrejt dollarit, ndërsa ndërprerja e internetit ka paralizuar bizneset. Analisti Jason Tuvey, zëvendëskryeekonomist për tregjet në zhvillim në Capital Economics në Londër, vlerëson se ekonomia do të mbetet e dobët nëse Teherani nuk kërkon lëshime nga SHBA për heqjen e bllokadës. "Gjithçka varet nga niveli i dhimbjes ekonomike që regjimi iranian është i gatshëm ta përballojë për synimet ushtarake dhe gjeopolitike", shtoi ai.
Thuhet se guvernatori i Bankës Qendrore, Abdolnaser Hemmati, i ka kërkuar presidentit Masud Pezeshkian hapa urgjentë për stabilizimin e ekonomisë, përfshirë rikthimin e qasjes së plotë në internet dhe një marrëveshje paqeje me Uashingtonin.
Zëdhënësja e Qeverisë, Fatemeh Mohajerani, vlerëson dëmet e përgjithshme në infrastrukturë, banesa dhe prona tregtare në 270 miliardë dollarë. Kjo shifër është nëntë herë më e lartë se buxheti publik i Iranit për vitin 2025 dhe afërsisht 60 për qind e prodhimit ekonomik të vendit, sipas faqes ekonomike Eghtesad News.