Ekonomia shqiptare dha shenjat e para të lodhjes, pas një periudhe kur buxheti i shtetit u ushqye nga bumi i ndërtimit, shifrat rekord të turizmit dhe rritja e pagave përmes indeksimit dhe një reagim më të mirë nga tregu i punës.
Në vitin 2025, buxheti publik arkëtoi 44.3 miliardë lekë më shumë se në 2024, me një rritje prej 6.2%, ritmi më i ulët pas pandemisë. Për më tepër, 78% e kësaj rritjeje erdhi nga tatimet mbi pagat dhe kontributet shoqërore e shëndetësore. Pesha e TVSH-së në arkëtimet totale ra në 30.1%, ndërsa 34.6% e arkëtmeve totale u siguruan nga profesionistët, mësuesit dhe mjekët.
Burimet kryesore të rritjes po shfaqin shenja maturimi, me agoninë e industrisë dhe bujqësisë, si dhe rënien e eksporteve. Ndërkohë, pavarësisht shpenzimit të 10 miliardë eurosh në investime gjatë një dekade, efikasiteti i tyre mbetet i ulët.
Sipas ekspertit të ekonomisë Oltion Rrumbullaku, sistemi fiskal shqiptar po pëson një ndryshim strukturor, ku tatimet mbi pagat po bëhen kolona kryesore. Ky trend filloi në vitin 2024, kur tatimi mbi pagat tejkaloi TVSH-në, dhe po thellohet në 2025 si pasojë e rritjes së pagës minimale. Efekti i reformës së pagave në administratën publike gjatë viteve 2023-2024 tashmë është reflektuar edhe në sektorin privat.
Sektori i ndërtimit po shkon drejt maturimit, ndërsa turizmi, pavarësisht rritjes, ka evazion fiskal të lartë dhe nuk kontribuon proporcionalisht me xhiron e tij. Kjo ngre pyetje për qëndrueshmërinë e modelit aktual fiskal.