Ekspertët e të drejtave të njeriut në Organizatën e Kombeve të Bashkuara (OKB) kanë dënuar masat e fundit të Shteteve të Bashkuara ndaj Kubës, duke i kërkuar Uashingtonit heqjen e sanksioneve që po thellojnë krizën humanitare në ishull. Në një deklaratë zyrtare, ata theksuan se kufizimet e zgjeruara ndaj sektorit energjetik, të shpallura më 23 korrik, kanë vështirësuar importin e karburanteve në një kohë kur vendi po përballet me mungesa akute dhe ndërprerje të shpeshta të energjisë elektrike.
Pasojat humanitare, sipas ekspertëve, po shndërrohen në një krizë të plotë, duke kërcënuar të drejtat për shëndet, jetë, ushqim dhe zhvillim. Ata paralajmëruan se ndërprerjet e energjisë kanë ndikuar negativisht në shërbimet shëndetësore, ndërsa agjencitë e OKB-së në Kubë kanë raportuar për rritje të pasigurisë ushqimore, mungesë ilaçesh dhe ulje të kapaciteteve për trajtimin e pacientëve me kancer. Gjithashtu, grumbullimi i mbeturinave në disa zona të Havanës po rrit rrezikun e përhapjes së sëmundjeve.
Ekspertët u bënë thirrje bashkësisë ndërkombëtare dhe shoqërisë civile që të veprojnë me shpejtësi për të shmangur atë që e përshkruan si një “Gazë të heshtur” në Kubë. Ata argumentuan se sanksionet amerikane bien ndesh me të drejtën ndërkombëtare dhe janë pjesë e një strategjie më të gjerë që synon ndryshimin e sistemit politik në vend.
Në përfundim, ekspertët kërkuan nga qeveria amerikane që të revokojë të gjitha masat që cenojnë sovranitetin e Kubës. Çështja u është referuar Këshillit të Sigurimit dhe Asamblesë së Përgjithshme të OKB-së për trajtim urgjent.