Eksportet shqiptare kanë nisur vitin 2026 me rënie prej 4.5% në janar, krahasuar me të njëjtën periudhë të vitit 2025, sipas të dhënave të INSTAT.
Në këtë tkurrje, negativisht kanë ndikuar grupet kryesore: “Minerale, lëndë djegëse, energji elektrike” me -2.9 pikë përqindjeje, “Tekstile dhe këpucë” me -1.8 pikë përqindjeje dhe “Produkte kimike dhe plastike” me -0.4 pikë përqindjeje. Pozitivisht kanë ndikuar “Makineri, pajisje dhe pjesë këmbimi” me +1.4 pikë përqindjeje dhe “Lëkurë dhe artikuj prej tyre” me +0.1 pikë përqindjeje.
Sektori në rritje
Grup malli “Makineri, pajisje dhe pjesë këmbimi” shënoi ecurinë më të mirë, me rritje prej 13%, duke zbutur tkurrjen e sektorëve të tjerë si tekstilet, këpucët, minerale dhe energjia. Edhe eksportet e ushqimeve, që zakonisht kanë tendencë pozitive, u tkurrën lehtë në janar.
Tkurrja e fasonit
Sektori i tekstileve dhe këpucëve, i njohur si fason, regjistroi shitje prej 8 miliardë lekësh në janar 2026, me rënie prej 5.8%. Përkundër shpresave për rikuperim pas tre vitesh rënie, ky sektor nisi vitin dobët.
Florian Zekja nga Shoqata ProEksport shpjegoi se kërkesa për mallra, kryesisht veshje pune, ka nisur e dobët për shkak të tarifave të SHBA-së dhe tkurrjes së industrisë në Gjermani. Gjithashtu, largimi i kompanive italiane drejt vendeve me kosto më të ulëta po krijon efekt psikologjik te klientët, që po largohen nga Shqipëria.
Tekstilet dhe këpucët mbeten grupi më i madh eksportues.