Policia e Kosovës njoftoi se një person i shpallur në kërkim ndërkombëtar është ekstraduar nga Franca drejt Kosovës. Operacioni për sjelljen e tij u realizua më 17 shtator nga Drejtoria për Bashkëpunim Ndërkombëtar Policor, në bashkëpunim me njësitë e tjera të Policisë dhe institucionet e drejtësisë.
Personi në fjalë ishte kërkuar nga autoritetet kosovare për shkak të dënimit me 4 vjet burgim për veprën penale “Mbajtja në pronësi, kontroll ose posedim të paautorizuar të armëve”, sipas nenit 374 të Kodit Penal të Republikës së Kosovës. Kërkesa për ekstradim ishte lëshuar nga Gjykata Themelore në Ferizaj.
Pas mbërritjes në Aeroportin Ndërkombëtar të Prishtinës, i dënuari është shoqëruar nga zyrtarët e ILECU-t (sektori për bashkëpunim ndërkombëtar policor). Pas procedurave të nevojshme, ai është dërguar në Qendrën e Paraburgimit në Hajvali, ku është dorëzuar për vuajtjen e dënimit të caktuar nga gjykata.
Përditësime
Autoritetet kanë identifikuar të ekstraduarin si 33-vjeçari Lulzim Demiri. Ai mbërriti në Aeroportin Ndërkombëtar 'Adem Jashari' në orën 00:30, ku iu dorëzua forcave të rendit për procedurat e mëtejshme.