Policia e Kosovës, përkatësisht Drejtoria për Bashkëpunim Ndërkombëtar Policor, në koordinim me njësitë e tjera relevante policore dhe institucionet e drejtësisë, ka realizuar ekstradimin e një shtetasi kosovar nga Zvicra në Kosovë më 16 shkurt 2026.
I dyshuari ishte arrestuar nga autoritetet zvicerane, pasi kërkohej me urdhërarrest ndërkombëtar për veprën penale 'Vrasje në tentativë'. Ai i ishte shmangur drejtësisë për një periudhë kohore.
Ekstradimi u bë i mundur falë bashkëpunimit ndërmjet institucioneve të Republikës së Kosovës dhe atyre zvicerane. Pas mbërritjes në Kosovë, i dyshuari u dorëzua njësive përkatëse policore për vazhdimin e procedurave ligjore.
Policia e Kosovës thekson se do të vazhdojë shkëmbimin e informacioneve me institucionet vendore, shtetet dhe organizatat ndërkombëtare. Qëllimi është parandalimi, hetimi dhe zbulimi i aktiviteteve kriminale, si dhe gjurmimi, kapja dhe arrestimi i personave dhe grupeve kriminale që veprojnë brenda dhe jashtë vendit.