Në Kampionatin Evropian të Peshëngritjes për të rinj, që zhvillohet në Batumi të Gjeorgjisë, peshëngritësja shqiptare Enkileda Carja ka vendosur dy rekorde evropiane.
Ajo theu rekordin në stilin e shkëputjes duke ngritur 103 kilogramë. Më pas, në stilin e shtytjes realizoi 123 kilogramë, çka i dha rekord në totalin e dygarëshit, sipas Federatës Shqiptare të Peshëngritjes.
Carja, 18-vjeçare nga Elbasani, përmbylli garën me këto arritje, duke u renditur në elitën e peshëngritjes evropiane për moshat e reja.
Në të njëjtin aktivitet, Federata Europiane e Peshëngritjes i akordoi asaj titullin “Ylli në Ngritje i Europës 2025”, që vlerëson talentin dhe përkushtimin e saj.
Federata Shqiptare e Peshëngritjes theksoi se kjo performancë nxjerr në pah nivelin e lartë të peshëngritjes shqiptare në arenën ndërkombëtare.