Erblin Osmani, futbollisti 16-vjeçar shqiptar, debutoi të shtunën me ekipin e parë të Bayern Munich në ndeshjen e Bundesligës kundër Union Berlin, të luajtur në Allianz Arena. Ndeshja përfundoi me fitoren 4-0 të bavarezëve.
Osmani u fut në lojë në minutën 87, ku zëvendësoi mesfushorin gjerman Leon Goretzka. Ky ishte grumbullimi i parë i tij me skuadrën kryesore, pas paraqitjeve të mira në stërvitje dhe me ekipin U-19 të Bayern. Trajneri Vincent Kompany i dha mundësinë për të luajtur tre minuta në fund të takimit.
I lindur në Gjermani, Osmani ka rrënjë nga Gjilani i Kosovës dhe luan si mesfushor defensiv. Ai ka qenë kapiten i ekipit U-17 të Bayern dhe është pjesë e përfaqësueses U-17 të Gjermanisë. Nuk ka vendosur ende për fanellën përfaqësuese të të rriturve, me interes nga Shqipëria dhe Kosova.
Ky debutim shënon një moment të rëndësishëm në karrierën e tij në akademinë e Bayern Munich.
Përditësime
Erblin Osmani debutoi si lojtari i tretë më i ri në historinë e Bayern Munich-it me ekipin e parë, në moshën 16 vjeç e 10 muajsh e 2 ditësh. Vetëm Paul Wanner dhe Filip Pavic kanë debutuar më të rinj.
Ai krahasohet me Angelo Stiller për lojën e zgjuar, strategjike dhe teknike. Të dy u rritën te TSV Milbertshofen; gjithashtu David Santos Daiber nga klubi ka luajtur 2 ndeshje këtë sezon.
Osmani u bashkua me Bayern në 2017, në moshën 8-vjeçare, dhe stërvitet rregullisht me ekipin e parë që nga fundi i shkurtit. Para debutimit, ishte i njohur në mediat kosovare, por i panjohur në Gjermani.