Presidenti i Turqisë, Recep Tayyip Erdogan, kritikoi fjalimet e mbajtura në Asamblenë e Përgjithshme të OKB-së, duke theksuar se personat përgjegjës për krime lufte dhe gjenocid duhet të përballen me drejtësinë, jo të flasin nga foltorja e institucionit ndërkombëtar. Ndonëse nuk e përmendi drejtpërdrejt, deklarata u lidh me fjalimin e kryeministrit izraelit, Benjamin Netanyahu. Sipas Erdogan, ata që kryejnë gjenocid duhet të përballen me pasojat ligjore për krimet e kryera, pasi në të kundërt mizoritë rrezikojnë të përsëriten.
Gjatë fjalimit në ceremoninë përmbyllëse të edicionit të 21-të të MUSIAD EXPO dhe Forumit të 29-të Ndërkombëtar të Biznesit në Stamboll, kreu i shtetit turk u shpreh se populli palestinez nuk është i braktisur dhe se Turqia do të vazhdojë të jetë zëri i të shtypurve. Ai theksoi se rajoni po përjeton një stuhi krizash, ndërsa sistemi global po përballet me sfida të rënda sa i përket legjitimitetit, përfaqësimit dhe drejtësisë.
Në aspektin ekonomik, Erdogan njoftoi se Turqia ka shënuar rritje të vazhdueshme në 24 tremujorët e fundit, duke u pozicionuar si ekonomia e 16-të më e madhe në botë dhe e gjashta në Evropë. Ai theksoi se numri i kompanive eksportuese është rritur ndjeshëm, nga 33.000 në vitin 2002, në 168.000 në vitin 2025. Presidenti shprehu përkushtimin për ruajtjen e rritjes së qëndrueshme nëpërmjet Programit të ri Afatmesëm të shpallur 20 ditë më parë.