Një defekt në linjën elektrike të tensionit 20 kV, që furnizon stacionin e pompave në Fushë-Milot, ka shkaktuar ndërprerje të përkohshme të punës së këtij stacioni. Sipas njoftimit zyrtar të Ujësjellës-Kanalizimeve Durrës (SHRUKD), problemi ka ardhur si pasojë e erërave të forta që kanë dëmtuar rrjetin elektrik.
Stacioni i pompave ka qëndruar jashtë funksionit nga ora 22:30 e mbrëmjes së djeshme deri në orën 06:00 të mëngjesit të sotëm. Ekipet teknike kanë punuar gjatë gjithë natës për riparimin e defektit, duke bërë të mundur rinisjen e punës së stacionit në orën 06:00.
Megjithëse riparimi është kryer, furnizimi me ujë do të vijojë të paraqesë problematika gjatë ditës së sotme në disa zona rurale të bashkisë së Durrësit. Zonat që preken nga ky çrregullim janë:
• Shkallë
• Sektor Rinia
• Arapaj
• Xhafzotaj
• Rrashbull
SHRUKD ka kërkuar mirëkuptimin e qytetarëve për këtë situatë të përkohshme, duke theksuar se normalizimi i plotë i furnizimit pritet pas rikthimit të presionit në rrjet.