Eric Wendt, i propozuar nga presidenti amerikan Donald Trump për postin e ambasadorit të Shteteve të Bashkuara në Shqipëri, do të raportojë nesër para Komitetit të Marrëdhënieve me Jashtë të Senatit. Seanca dëgjimore është caktuar të zhvillohet në orën 10:00 në ambientet e Senatit (SD-419), ku Wendt do të japë dëshminë e tij dhe do t’u përgjigjet pyetjeve të senatorëve.
Wendt është gjenerallejtënant në pension me më shumë se 34 vite shërbim aktiv në ushtrinë amerikane. Ai ka shërbyer si komandant i Selisë së Operacioneve Speciale të NATO-s dhe ka mbajtur poste të rëndësishme në Evropë, Lindjen e Mesme dhe Azi. Ai ka bashkëpunuar edhe me efektivë ushtarakë shqiptarë gjatë dislokimeve në Evropë dhe Afganistan.
Shqipëria nuk ka pasur ambasador të SHBA-së që prej largimit të Yuri Kim në vitin 2023. Aktualisht ambasada amerikane në Tiranë drejtohet nga e ngarkuara me punë Nancy VanHorn. Nominimi i Wendt duhet të kalojë në Komitetin për Politikë të Jashtme dhe të marrë miratimin përfundimtar nga Senati.
Përditësime
Donald Trump propozoi zyrtarisht Eric Wendt më 13 prill për postin e ambasadorit në Shqipëri. Wendt, i cili raporton nesër para Komitetit të Senatit, shërbeu dy vjet në Ambasadën e SHBA-së në Jerusalem si Koordinator Sigurie për Izraelin dhe Autoritetin Palestinez, ku udhëhoqi një koalicion prej tetë vendesh dhe raportoi drejtpërdrejt te Sekretari i Shtetit. Ai ka komanduar organizata me mijëra personel. Senati nuk konfirmoi kandidatin e mëparshëm të Joe Biden, David Kostelancik.
Eric Wendt, 61 vjeç, do të raportojë nesër në orën 16:00 para Komitetit të Senatit për postin e ambasadorit në Shqipëri. Ai la detyrën aktive më 29 janar 2021 dhe shërbeu si shef i shtabit në Komandën e Paqësorit të SHBA-së. Wendt u nderua me medalje presidenciale nga Filipinet dhe Koreja e Jugut; roli i tij si Koordinator Sigurie zgjati nga nëntor 2017 deri në tetor 2019.