Deputeti socialist Erion Braçe ka reaguar publikisht lidhur me votën e tij pro reformës territoriale në seancën e 8 tetorit. Ndonëse e kishte kundërshtuar projektligjin si të pamjaftueshëm për një reformë të vërtetë, Braçe theksoi se vendosi ta mbështeste për të vijuar shërbimin ndaj qytetarëve që i kanë dhënë besimin, duke mohuar çdo ndikim të jashtëm në këtë qëndrim.
Në një reagim të gjatë, Braçe adresoi kritika të forta ndaj mënyrës së udhëheqjes së Partisë Socialiste nga kryeministri Edi Rama. Ai e konsideroi deformim antidemokratik presionin e ushtruar përmes modelit “ose voto, ose je jashtë grupit”, duke theksuar se është e papranueshme që bindjet e deputetëve të mposhten nga disiplina e grupit parlamentar.
Lidhur me akuzat e Ramës për “duar të pista” që kishin ndikuar në qëndrimin e tij, Braçe u shpreh se vota e tij ishte personale dhe e pandikuar. Ai i kërkoi hapur kryeministrit të sqarojë se kujt i referohej me këto akuza dhe i sugjeroi të reflektojë mbi gabimet e veta. Sipas deputetit, Rama është i dashuruar me pushtetin dhe duhet të marrë përgjegjësi nominale për vendimet e gabuara, duke e ushtruar pushtetin sipas përcaktimeve kushtetuese dhe jo si pronë personale. Deputeti gjithashtu nënvizoi se e kishte njoftuar kryeministrin në mbledhjen e grupit se nuk kishte votuar pro tij në zgjedhjet e brendshme, duke kërkuar që Rama të mos flasë në emrin e tij për votën e shprehur në seancë.