Boksieri shqiptar Ermal Hadribeaj është konfirmuar zyrtarisht si sfidues për titullin e botës në boksin profesionist në kategorinë super-uelter. Meçi ndaj kampionit aktual, Sebastian Fundora, do të zhvillohet më 17 tetor, ndërsa vendi i saktë i zhvillimit të kësaj përballjeje pritet të caktohet në vijim.
Ermal Hadribeaj, i cili është me origjinë nga Tirana dhe jeton prej vitesh në Shtetet e Bashkuara të Amerikës, kërkon të shkruajë histori në sportin e boksit. 32-vjeçari ka shënuar një karrierë të suksesshme me 23 fitore dhe asnjë humbje deri më tani. Rruga drejt këtij titulli prestigjioz të organizatës WBC u hap pas fitores së tij më 23 maj në Oberhausen të Gjermanisë, ku mposhti Bakary Samake për të rrëmbyer brezin WBC Silver Super Welterweight.
Ky triumf i siguroi atij statusin e sfiduesit të detyrueshëm për titullin e botës në kategorinë super-uelter, duke i hapur rrugën për përballjen e madhe ndaj Sebastian Fundorës. Organizata WBC konsiderohet si një ndër katër versionet më të rëndësishme në botën e boksit, duke e bërë këtë duel një ngjarje të rëndësishme për përfaqësimin shqiptar në arenën ndërkombëtare.
Kundërshtari i tij, Sebastian Fundora, 28 vjeç, përfaqëson Shtetet e Bashkuara të Amerikës. Ai mban një bilanc prej 24 fitoresh dhe 1 humbjeje në karrierën e tij si boksier profesionist.