Bashkimi Evropian i Transmetuesve (EBU) ka miratuar ndryshime thelbësore në rregulloren e Festivalit Evropian të Këngës. Sipas rregullave të reja, vendi fitues nuk do të gëzojë më të drejtën automatike për të pritur edicionin pasardhës, nëse është i përfshirë në konflikte të armatosura ose situata të ndjeshme gjeopolitike që cenojnë sigurinë dhe mbarëvajtjen e eventit.
Në raste të tilla, EBU do të kërkojë një vlerësim të pavarur të sigurisë dhe mund të përzgjedhë një transmetues tjetër si pritës, i cili do ta organizojë konkursin në emër të tij. Këto ndryshime pason debatet e viteve të fundit dhe precedentin e vitit 2023, kur Mbretëria e Bashkuar e organizoi eventin në vend të Ukrainës për shkak të luftës.
Ndryshime teknike dhe rregulla të reja
Përveç kritereve të sigurisë, rregullorja e përditësuar për vitin 2027 sjell disa risi të tjera:
- Mosha minimale e artistëve është rritur në 18 vjeç në ditën e provës së parë, nga 16 vjeç që ishte më parë.
- Këngëtarët kryesorë janë të detyruar të interpretojnë melodinë live. Elementet e regjistruara mund të përdoren, por nuk lejohet që ato të zëvendësojnë ose ndihmojnë në mënyrë të padrejtë vokalin kryesor.
- Në gjysmëfinale, kualifikimi do të përcaktohet kryesisht nga vota e publikut, me mundësinë e përfshirjes së pikëve të jurisë sipas miratimit të EBU.
- Janë vendosur kufizime ndaj fushatave të tepruara të votimit që mbështeten nga shtetet.
Sipas EBU, ndryshimet synojnë të forcojnë qartësinë, transparencën dhe mbrojtjen e artistëve. Aktualisht, Eurovisioni 2027 është planifikuar të mbahet në Bullgari, pas fitores së këngëtares Dara në majin e këtij viti.
Përditësime
Pesë shtete, përfshirë Spanjën, Holandën, Irlandën, Islandën dhe Slloveninë, njoftuan bojkotin e edicionit të vitit 2026 të Eurovisionit. Vendimi pason polemikat mbi pjesëmarrjen e Izraelit në këtë konkurs muzikor. EBU ende nuk ka publikuar një reagim zyrtar lidhur me ndikimin e këtij bojkoti në strukturën e organizimit për vitin e ardhshëm.