Tensione të reja në Lindjen e Mesme kanë çuar në urdhër për evakuim të pjesshëm të personelit nga baza ushtarake amerikane Al Udeid në Katar. Sipas tre burimeve diplomatike që kanë folur për Reuters, personeli duhet të largohet deri të mërkurën në mbrëmje. Ambasada e SHBA-së në Doha nuk ka dhënë ende një reagim zyrtar, ndërsa numri i saktë i personave të prekur nuk është bërë i njohur.
Baza Al Udeid është instalimi më i madh ushtarak amerikan në Lindjen e Mesme dhe strehon rreth 10 000 ushtarë. Ajo shërben si qendër kryesore operative për forcat amerikane në rajon.
Paralajmërimet e Iranit
Një zyrtar i lartë iranian deklaroi për Reuters se Teherani ka paralajmëruar vendet e rajonit se do të sulmojë bazat ushtarake amerikane në territorin e tyre në rast të një sulmi amerikan ndaj Iranit. Këto mesazhe u janë dërguar vendeve si Arabia Saudite, Emiratet e Bashkuara Arabe dhe Turqia, me kërkesën që ato të ndërmjetësojnë për të ndaluar veprimet ushtarake nga Uashingtoni.
Gjithashtu, Irani ka dërguar sinjale paralajmëruese ndaj Izraelit, duke lënë të kuptohet se çdo përshkallëzim do të sjellë reagime në të gjithë rajonin. Këto zhvillime vijnë pas deklaratave të vazhdueshme kërcënuese të presidentit amerikan Donald Trump ndaj Iranit.
Përditësime
SHBA ka urdhëruar "ndryshim qëndrimi" (change of posture), jo evakuim të pjesshëm të urdhëruar, në bazën Al Udeid në Katar, sipas një diplomati amerikan. Ky veprim vjen mes protestave në Iran dhe kërcënimit të SHBA-së për ndërhyrje ushtarake në mbrojtje të protestuesve. Ngjarje të ngjashme përfshijnë zhvendosjen e personelit para sulmeve ajrore SHBA-Iran të vitit të kaluar dhe sulmin raketor iranian ndaj bazës në qershor.