Autoritetet italiane në rajonin e Pulisë kanë nisur operacionet e evakuimit të turistëve dhe pushuesve në komunën Peschici, pas shpërthimit të një zjarri në zonë. Sipas njoftimit zyrtar të Rojes Bregdetare, deri në orët e pasdites së të dielës, janë evakuuar mbi 400 persona, ndërsa vijojnë përpjekjet për largimin e rreth 300 qytetarëve të tjerë, duke qenë se rruga detare mbetet e vetmja mundësi e sigurt për shpëtim.
Në këto operacione janë angazhuar gjashtë anije të Rojes Bregdetare, tri anije të Rojes Doganore, si dhe dhjetëra varka private që ndodheshin në zonë për të ndihmuar transportin e njerëzve. Pamjet nga vendngjarja tregojnë angazhimin e forcave zjarrfikëse dhe përdorimin e një avioni të tipit Canadair për shuarjen e flakëve.
Kryetari i komunës së Peschicit, Luigi d’Arenzo, deklaroi për gazetën La Gazzetta del Mezzogiorno se situata aktualisht është nën kontroll dhe se zjarri nuk paraqet kërcënim për banesat përreth. Pavarësisht kësaj, reja e tymit është shfaqur në përmasa të mëdha, duke qenë e dukshme edhe nga një distancë prej disa dhjetëra kilometrash. Autoritetet lokale po presin përforcime të mëtejshme me mjete ajrore nga Roma për të neutralizuar plotësisht vatrat e zjarrit.