Kapiteneria e Portit të Durrësit mori një thirrje për ndihmë nga kroçiera Marbella Explorer II në orën 23:50, rreth 20 milje larg Durrësit. Kroçiera lundronte nga Korfuzi drejt Kotorit dhe në bord ndodhej një shtetas anglez me simptoma të rënda shëndetësore.
Menjëherë pas sinjalizimit, autoritetet portuale udhëzuan kroçierën që të afrohej në radë. U vu në lëvizje operacioni për evakuimin e të sëmurit me ndihmën e rimorkiatoreve dhe ambulancës.
Në orën 02:30, shtetasi anglez me inicialet C.P. mbërriti në Spitalin Rajonal të Durrësit dhe ndodhet jashtë rrezikut për jetën. Në operacion u angazhuan rimorkatori Joni i ASHD-së, FSPD, Policia Kufitare, si dhe oficerët dhe kapiteni i portit.
Sipas një burimi, pacienti vuan nga hernia ventrale akute.