Evakuohen turistët nga anija Viking Ullur në lumin Danub

Anija turistike Viking Ullur, e cila mbante flamurin zviceran, ka ngecur në kilometrin 817 të lumit Danub, përballë fshatit Gomotartsi dhe rreth 25 kilometra larg qytetit të Vidinit në Bullgari. Incidenti ndodhi gjatë orëve të natës, rreth orës 02:20, ndërsa anija po lundronte në itinerarin nga Drobeta-Turnu Severin në Rumani drejt Vidinit.

Sipas njoftimit zyrtar të Ministrisë së Brendshme të Bullgarisë, të gjithë 186 pasagjerët, shtetas të vendeve të Bashkimit Evropian, u evakuuan me sukses nga ekipet e rojes kufitare. Operacioni u bë i domosdoshëm pasi tentativa e anijes Vivaldi me flamur francez për të transportuar pasagjerët dështoi për shkak të pamundësisë së afrimit pranë vendit ku anija kishte ngecur. Pasagjerët kishin mbetur pa furnizime me ushqim dhe ujë të pijshëm, pasi mjeti lundrues nuk arriti të mbërrinte në portin e Vidinit për t'u furnizuar siç ishte planifikuar.

Ndërsa pasagjerët janë transportuar në siguri, 52 anëtarët e ekuipazhit kanë mbetur në bordin e anijes. Autoritetet bullgare kanë bërë të ditur se fati i mjetit lundrues mbetet i paqartë, pasi pozicionimi i tij varet nga kushtet e lundrimit dhe mundësitë për rinisjen e lëvizjes. Transferimi i bagazheve të pasagjerëve është raportuar si një proces që vazhdon ende.

Ngjarja është pasojë e thatësirës që ka përfshirë Evropën, duke shkaktuar rënie të ndjeshme të nivelit të ujit në lumin Danub, një nga arteriet kryesore lundruese të kontinentit. Policia kufitare ka publikuar pamje ku shihen pasagjerët me jelekë shpëtimi gjatë operacionit të ndihmës.