Një valë e re e të nxehtit ekstrem ka përfshirë kontinentin evropian, duke sjellë temperatura rekord. Në Itali, autoritetet kanë lëshuar alarmin e kuq për herë të tretë brenda pak javësh.
Sot, niveli maksimal i rrezikut është aktiv për Firencen, Peruxhian, Breshian dhe Torinon, ndërsa të mërkurën do t'i shtohen edhe Bolonja, Frosinone dhe Roma.
Sipas meteorologëve, temperaturat do të variojnë nga 39°C deri në 41°C në pjesën më të madhe të Italisë qendrore e jugore, si dhe në ishullin e Sardenjës. Në zonat e brendshme, termometri mund të shënojë deri në 45°C deri në fund të javës. Përveç vapës, Italia përballet me thatësirë të rëndë dhe mungesë të burimeve ujore, veçanërisht në rajonin e Piemontes.
Kushtet e motit kanë ndikuar ndjeshëm në sigurinë publike:
• Në Firence, korrierët e ushqimit kanë paralajmëruar grevë, duke kërkuar masa më të forta mbrojtëse gjatë punës në ambiente të hapura.
• Në Mbretërinë e Bashkuar, temperaturat mbi 30°C kanë favorizuar rrezikun e zjarreve.
• Në Francë, zjarret kanë përfshirë një pjesë të pyllit të Fontainebleau.
• Në Gjermani, autoritetet njoftuan për 99 viktima nga mbytjet e regjistruara vetëm gjatë muajit qershor.
Përditësime
Autoritetet italiane konfirmuan vdekjen e 3 personave për shkak të temperaturave ekstreme, ndërsa Ministria e Shëndetësisë e ka shtrirë alarmin e kuq në 27 qytete. Ndërkohë, ekipet e zjarrfikësve po punojnë për shuarjen e vatrave të reja të zjarrit në Marsica dhe në afërsi të Triestes.