Deputeti i LDK-së, Fadil Hadergjonaj, ka reaguar publikisht lidhur me zhvillimet e fundit brenda partisë, pas kërkesave të shprehura nga dy degë të këtij subjekti për dorëheqjen e kryetarit Lumir Abdixhiku.
Në mesazhin e tij, Hadergjonaj theksoi nevojën për një analizë të thellë, kolektive dhe të sinqertë, duke nënvizuar se uniteti është një përgjegjësi kombëtare. Sipas tij, në një kohë kur Kosova po përballet me stagnim institucional, polarizim shoqëror dhe mungesë të perspektivës zhvillimore, LDK-ja nuk e ka luksin të përfshihet në beteja personale apo ndarje të brendshme.
Deputeti deklaroi se çdo energji duhet të drejtohet nga forcimi i partisë dhe roli i saj në shërbim të shtetit. Ai shprehu besimin se LDK-ja do të vazhdojë të mbrojë vlerat e saj si zë i arsyes dhe dialogut, duke vendosur interesin e qytetarëve mbi çdo interes individual. Hadergjonaj e përshkroi partinë si një forcë historike që ka detyrim ndaj anëtarësisë dhe historisë së saj për të ofruar zgjidhje për sfidat aktuale të vendit.