Kryetari i Nismës, Fatmir Limaj, ka bërë thirrje që Salih Mustafa dhe Pjetër Shala të sillen në Kosovë për të vuajtur dënimin e tyre me burgim, menjëherë pas hyrjes në fuqi të ligjit të ri për Dhomat e Specializuara. Këtë deklaratë Limaj e dha gjatë një interviste në emisionin Rubikon në Klan Kosova.
Sipas Limajt, avokatët e dy të dënuarve duhet të ndërmarrin hapa të menjëhershëm për të ushtruar kërkesat për transferim sapo ligji të nënshkruhet nga Presidentja dhe të bëhet pjesë e legjislacionit në fuqi. Ai theksoi se bazuar në nenet 15, 16 dhe 17 të ligjit të miratuar, ekziston baza ligjore që procedura e vuajtjes së dënimit të zhvillohet brenda territorit të Kosovës.
Në mënyrë të veçantë, Limaj u shpreh se neni 16 përcakton qartë se dënimet e shqiptuara nga Dhomat e Specializuara mund të kryhen në institucionet korrektuese të vendit, në pajtim të plotë me legjislacionin në fuqi të Republikës së Kosovës. Ai e vlerësoi këtë si veprimin e parë që duhet ndërmarrë sapo legjislacioni i ri të jetë zyrtarisht në fuqi.